٤ اختلافات بين ستات زمان والستات الآن

١ - الوِسط

زمان كل الستات كان عندهم وسط، تلاقى فاتن حمامة ترتدى فستان منفوخ من فوق ومنفوخ من تحت أما الوسط فملفوف عليه حزام فى حجم الخاتم الذى ترتديه فتيات هذه الأيام، وأيضا زمان تلاقى الراجل يرقص فى التياترو مع مديحة كامل ولافف إيده أربع مرات على وسطها، أما الآن فالراجل يحتاج إلى دراع طوله متر ونص كى يلفه حول وسط زوجته، فأين الوسط بتاع زمان؟ لماذا ظهرت الآن موضة الفساتين الحتة واحدة التى تشبه كيس المخدة.

٢ - السيقان

مبدئيا نحن لا نسخر من أحد ولكننا نسرد بعض المشاهدات، فالسيقان اختلفت شكلا ومضمونا عن زمان، ففى الستينيات وفترة المينى جيبات ماتلاقيش واحدة فيها غلطة، ثم جاءت فترة التغطية الكبرى فى الثمانينيات والتسعينيات لنستيقظ فجأة على ظهور الاختراع الذى يسمى بنطلون سيجار ليكشف لنا مأساة تمشى على قدمين أو قل مأساة القدمين نفسها، حيث اكتشفنا كم فى مصر من الالتصاقات والتقوسات ليس لهما علاقة بالتناسق والجمال الذى كنا نشاهده فى أفلام فؤاد المهندس والحب سنة سبعين، البعض أرجع الظاهرة إلى أن البنت بتلبس كعب عالى وهى صغيرة وهو ما يربى لها عضلات ويسبب التقوسات، ولكن هذا مردوده إلى أن اللبنانيات مثلا بيلبسوا كعب عالى من سن أربع سنين ونص ومافيش واحدة عندها العيوب دي، فماذا حدث؟.

٣ - الشياكة

لن نقارن بين نجمات السينما زمان وبين فتيات عاديات الآن، ولكننا سنقارن بين العاديات زمان وفتيات دلوقتى، فمثلا بص للباك جراوند فى مشاهد أى فيلم قديم يصور فى الشارع أو فى أحد الأندية، هتلاقى فتيات مافيهومش واحدة مش شيك، فساتين إيه وبنطلونات ايه وجمال ايه، ده حتى المايوهات كانت افضل من المناظر السخيفة التى نراها الآن فى بعض المجلات المتخصصة فى نشر صور فتيات مارينا،

وحتى الحارة الشعبية زمان كانت راقية بشكلها وناسها، حاول تدور على حارة زمان كان فيها واحدة مبهدلة ومش شيك، حتى زينات صدقى اللى كانت رمز العنوسة مكنش فيها غلطة، غلطة واحدة والنبى، زينات دى شياكة وفساتين قصيرة وعنين عسلى وعود متناسق وشعر دايما عاملاه فورمة ومالهاش أى علاقة بالفتيات اللى بنشوفهم دلوقتى فى الحارات الشعبية أو حتى بنشوفهم فى شارع طلعت حرب كلهم لابسين بادى كارينا أخضر وفوقيه بلوزة صفرا وكأن البنات كلهم انضموا لتنظيم حزب الله.

٤ - الشعر

كله كوم وموضوع الشعر ده كوم تاني، فالبنت الآن إما لمة شعرها وإما فارداه وخلاص، هات لى واحدة عاملة فورمة غير لما بتروح فرح، هل اختلفت جينات الشعر أم قل الاهتمام به أم أن فتيات زمان كان لديهن شعر أما فتيات الآن فلديهن كنافة شعر.

هل شاهدت نجاة وصديقاتها؟ هل شاهدت الشياكة والبساطة والجمال؟ هل شاهدت الجيبات والبنطلونات والخجل والبراءة؟ أريد فقط أن أذكرك بأنهن كن طالبات جامعيات وطالعين رحلة، هل عرفت الآن الفرق بين هؤلاء وبين فتيات الجامعة فى «كلم ماما» وهم بيغنوا «احنا بنات الجامعة اللامعة» شفت بقى الفرق بين العود بتاع زمان وبين العمود بتاع دلوقتى.

حسن الختام: شر الولية ما يضحك