فاتت جنبنا 
فاتت جنبنا انا وهو 
وضحكت لنا انا وهو
رديت وكمان رديت وفضلت ارد لحد ما فاتت
ونسيت روحى وصحيت
اتاريها خدت الشمس وغابت
وانشغلت وقبل ما يطول انشغالى
رحت سائل روحى واحترت فى سؤالى
انا بافكر ليه .. وباشغل روحى ليه
اعرف منين انها قصدانى انا مش هو
واعرف منين ان الضحكة دى مش له هو 
وليه انا ليه مش هو
مرة تانية برضه صدفة 
كنت انا وهو فى طريقنا
شفنا خطوة حلوة جاية وضل تالت بيسابقنا
التفت لقيتها هى .. حاجة مش معقولة هى هى
وابتديت اسمع فى قلبى لحن حب 
لحن حب جديد على 
سمعت منها كام كلمة 
ماقالتش منهم ولا كلمة 
بس انا حسيت .. ولاول مرة باعيش وباحس
ولقيتنى بادوب .. فى كلام الهمس اللى مالوش حس
ضحكت تانى نفس الضحكة وراحت ماشية
زى الدنيا ما تيجى فى ثانية وتمشى فى ثانية
بصيت لصاحبى لقيته جنبى ومهوش جنبى
عايز يقول كلمة اتقالت جوه فى قلبى
كنت عايز اساْله .. هو كمان حس بيها وانشغل
هو كمان حس بيها وانشغل .. هو كمان
ورجعت اقول انا بافكر ليه 
وباشغل روحى ليه
اعرف منين انها قصدانى انا مش هو 
واعرف منين ان الضحكة دى مش له هو 
ولييييييييييييييه انا ليه مش هو 
روحت انا روحت .. روحت مش عارف مالى 
ماعرفش ايه اللى جرى لى 
فرحان عايز اضحك مهموم عايز ابكى 
لا دموعى طايلها ولا لاقى حتى اشكى
حبيتها ايوة انا حبيتها 
مش قادر انسى ضحكتها
مش يمكن دى فرحة عمرى 
والفرحة ما صدقت لقيتها
كان فين اليوم ده غايب عنى 
كان فييييييين .. تسلم لى وتسلم ضحكتها

وبعد يومين ابتدى قلبى 
يصحى من الفرحة وصحانى 
يساْلنى امتى هنشوفها 
وانا اقوله نشوفها فين تانى
والليالى دوبتنى وشيبت فكرى وظنونى
لما طيف الغيرة شوفته بيترسم قدام عيونى
ان لقيت صاحبى بيضحك اقول 
دى لازم قابلته
وان لمحت فى عينه شكوى اقول
دى لازم خاصمته
مالقيتش طريق قدامى يرحمنى من العذاب
غير انى ادور واساْل واعرف منها الجواب
وعرفت طريقها عرفته 
وشقيت على بال ما عرفته .. عرفته
وبعت كلمتين .. مش اكثر من سطرين
قولت لها ريحينى .. قولى لى انا فين
وجانى الرد جانى 
ولقيتها بتستنانى
وقالت لى انا من الاول
باضحك لك يا اسمرانى
انا انا انا .. مش هو