مره، كنت قاعد فى البيت ع المكتب و اختى و عيالها قاعدين قدامى ع الارض و امى قاعده ع الكنبه، روحت وقفت و قولت فى خطاب القذافى زنجه زنجه و خدتنى الجلاله و صوتى على، لقيت صوت من برا الاوضه بيقول مش عارف انام يا جحش، روحت بعلو صوتى قولت من انتم من انتم، لقيته بيرد انا ابوك يابن الكلب

النهارده، كنا فى درس رياضه و المستر رسم مسأله هندسه ع السبوره و بص كده لقى واحد مش مركز فا قاله قوم حل المسأله دى، لقينا الواد قام مسح السبوره و رجع اعد تانى

النهارده، امى كانت بتكلم جدى و بتقوله ايه رأيك فى الثوره؟ قالها لأ طبعا مش موافق، قالتله ليه؟ قالها الواد اللى عمل الثوره ده طلع ع التليفزيون مع منى الشاذلى قالها انا مكنتش عايز الناس تعرف انى مدمن، قالتله مين ده؟ قالها وائل منير،

مره، كنت قاعد ع القهوه بشرب شيشه و جالى تليفون، فا قومت عشان ارد لقيت اخويا الكبير فى وشى و بيبص ع الترابيزه اللى كنت قاعد عليها انا و صاحبى، سألنى مين اللى بيشرب شيشه؟ قولتله ده محمد صاحبى، قالى ماشى، قولت فى سرى الحمد لله عدت على خير، لقيت صاحبى ندهلى بصوت عالى قالى تعالى يا عم الحجر بتاعك هيطفى،

مره، كنت عامل ادد على الفيس بوك واحده صورتها جامده اوى، قبلت الاضافه ببص على تاريخ الميلاد لقيته مارس2001، فا دخلت و اتكلمت معايا بقولها انتى عندك كام سنه؟ قالتلى 11 سنه، قولتلها اومال صوره مين دى؟ قالتلى ماما

النهارده، كنت فى الصيدليه و لقيت البنت اللى شغاله معايا دخلت المعمل و نادت عليا، انا قولت اوبا السناره غمزت يا معلم، دخلت المعلم قولتلها نعم؟ قالتلى انتا زى اخويا انا هقولك حاجه الصيدليه كلها عارفاها بس مش عارفه اقولهالك ازاى، قولتلها قولى متقلقيش و فرحان بقى، قالتلى ريحه جزمتك وحشه اوى

النهارده، كنت راكب توكتوك انا و واحد صاحبى، لقينا سواق التوكتوك معلق صوره اخت صاحبى ده على الازاز، انا شوفتها و طنشت، بعد شويه لقيت صاحبى قاله احا انتا جبت الصوره دى منين، تعرفها منين اصلا؟ السواق راح ضحك و قاله دى الحته يا برنس

النهارده، بابا رجع من العمره، و العربيه بتاعته كانت مركونه فى الجراش 10 ايام، فا قالى انزل اغسلها يا حسن، انا لقيت جردل ميه ادام الباب فا خدته غسلت بيه العربيه و خلصت تمام، طالع بقى لقيت ماما بتقول لبابا فين ميه زمزم اللى جبتها؟ قالها ادام الباب هاتها يا حسن من برا

مره، كنت رايح الكليه وانا ف كليه حاسبات، كنت لابس محترم عشان كان عندي امتحان شفوي و تسليم مشروع والمفروض اني اسلم المشروع ده علي اسطوانه، ركبت الاتوبيس قعدت جنب راجل كبير ف السن وبنكلم، قالي كشكول محاضراتك ده قولتلو اه قالي وريني بتاخدو ايه، اديته الكشكول وفتحه لقي الاسطوانه، لقيته قام فى وسط الاتوبيس و باعلي صوته و قال هي دي المحاضرات اسطوانه، يا ابني حرام عليك و الست اللي ورايا تقولي يا ابني صحتك، و الراجل يقولى و عامل فيها محترم، و السواق يقول هو ده اللي مبوظ الشباب

النهارده، كنت في الشغل و كان فيه واحده جامده جدا لسه متعينه، فروحت اظبطها واتكلم معاها، قولت اعرفها ع الناس الي هنا، و كان المدير جاي علينا فقولتلها ده بقي ابو الفساد، قالتلي دا بابا

النهارده، واحد صاحبي قالي ع موقع اسمه العصفوره، و فضل يحكيلي عنه اكتر من ساعتين، واقوله يابني في موقع اسمو العصفوره؟ يقولي اه موقع اجنبي كده و جامد، خدت لحظات صمت كده و بصيتله و نطقت: تويتر يا حازم؟ قالي ايووووووه اللي فيه عصفوره زرقا

النهارده، كنا عازمين خطيبى على الغدا، و جه و كلنا و كان يوم جميل، بعد الاكل بشويه قال لبابا عايزك فى كلمتين، و راحو اعدو فى الصاله لوحديهم يتكلمو اكتر من ساعه و سمعت صوت باب الشقه بيترزع، سألت بابا فى ايه؟ قالى فسخ الخطوبه

مره، كنت اعد مع اصحابى بنتفرج على فيلم كينج كونج، فجأه لقيت واحد منهم بصلنا كده باستغراب و قال هما ازاى اقنعو الغوريلا انها تمثل فى الفيلم

مره، كنت راكب في عربيه في الموقف انا وواحد تاني وفيه عربيه قدامنا بتركب الناس و لسه ناقصها اتنين علشان تكمل وتطلع، فالسواق بيقول لسواق العربيه اللي انا فيها يا اسطي ماتديني الاتنين دول علشان اكمل العربيه وامشي، السواق قاله ده انا اكب عليهم جاز واولع فيهم ولا اني اديهوملك

النهارده، كنت ماشى فى الشارع بدور ع تاكسى، لقيت واحد بينادى من بعيد يا خاااالد يا خااالد، ببص كده لقيته جاى جرى عليا انا و فجأه راح حضنى و ازيك و ازى ابوك و اخواتك، و انا معرفوش اساسا، اعدت اقوله انا مش خالد و ربنا ما خالد، و هوا مصمم و يقولى كبرت و شكلك اتغير، لغايه ما فهم فى الاخر و قالى معلش اصلك شبه ابن واحد حبيبى اوى، مشيت و ركبت التاكسى و كله تمام، التاكسى وصلنى و لما نزلت احاسب السواق ملقتش المحفظه

النهارده، كان عندنا امتحان شفوى فيزيا (هندسة اسكندرية) و انا جى مذاكر بقى و قلقان، لقيت واحد صاحبى طالع من اوضه الدكتور زعلان بقوله مالك قالى الدكتور بيقولى لو فى التجربة شلت الزيت وحطيت ملوخية ايه اللى يحصل؟ قولتله اشيل الكلور و احط ارانب يا دكتور قالى برا يا خفة و زيرو شفوى

النهارده، كنت قاعد بذاكر (بقالى كتير اوى مذاكرتش) بس ربنا فتح عليا و قعدت اذاكر، فجأه لقيت ابويا جه من برا و قالى يا عم قوم نزلى لعبه جديده ع الموبايل و سيبك من اللى انتا بتعمله ده قال يعنى هتفلح

مره، كنت خارج انا و واحد صاحبى و معانا واحد صاحب صاحبي ده، المهم البت كانت قالتلي لما تيجي الساعه 8 كلمني، و الساعه كانت 8 وانا معييش رصيد ومفيش سنترالات في الحته اللي احنا فيها، سألت صاحبى معاك رصيد قالي لأ، فأستأذنت صاحب صاحبي ده و قولتله البت دي مش عايزها تزعل مني لأنها ساعات بتفك زنقتي و جدعه، قالي قول الرقم، قولتله الرقم و بيدوس اتصال، لقى الرقم متسجل عنده باسم اخته

النهارده، كنت بحضر عملية ولادة قيصرية تبع الكلية لقيت دكتور التخدير دخل و قبل ما يخدر الست اللى هتولد حط ايده على كتفها و قالها : انتى متجوزة؟ راحت بصتله كدة من فوق لتحت و قالتله لأ

مره، ايام اللجان الشعبيه، واقف انا واتنين صحابي واقفين على ناصية شارعنا مع العلم اننا كنا (مصطبحين) واحد من صحابي جاب فرخه وربطها من رقبتها وبقي يلف حوالين العربيات، لو الفرخه طلعت صوت بيفتش العربيه لو مطلعتش صوت يبقي العربية دى نضيفة

مره، كنت شغال فى مكتبه و جالى مندوب من شركه للورق، استلمت منه البضاعه و خلصنا و قالى لو عايزين حاجه تانيه ابقى كلمنى، قولتله خلاص تمام، قالى طب اكتب بقى ايميل رمزى، قولتله مين رمزى؟ قالى لا اكتب ايميييل رمزى، قولتله مانا معرفوش هوا مين ده، قام واخد الورقه و كتب رقمه و تحتيه كتب (ايميل رمزى)، طلع اسمه

مره، كنت قاعد انا و اخويا الصغير بنتفرج على فيلم اجنبى، فانا عارف ان فى نص الفيلم حته مش ولابد، قبلها بشويه قولت لاخويا قوم هاتلى اما اشرب من المطبخ عشان ميشوفش الحتة يعنى، لما جه قالى ايه ده " انا حقا اعترض " البت قلعت وانا مش هنا

مره، كنت راكب ميكروباص من الميكروباصات اللي عامله زي علب السردين دي و بعدين جت واحده كده مش على بعضها و قعدت جنبي و لزقت فيا جامد، قمت انا باعد نفسي عنها و بعدين لقيتها لزقت فيا تاني فبعدت تاني و بعدين جه مطب جامد قوي لقيتها قاعده على رجلي و بتقولي معلش اصل العربيه ضيقه

مره، كنت بصلي في الجامع فكنت في وضع الوقوف، فلقيت واحد عايز يعدي من قدامي فمديت ايدي على الاخر عشان ميعديش، فقمت لقيته مادد ايده هو كمان وقام مسلم عليا و بايسني

النهارده، واحد صاحب ابويا اتصل في البيت و صوته زي صوت واحد صاحبي بالظبط، لقيته قالي اديني حد كبير اكلمه وعايز بابا والكلام ده، روحت قايله احنا هنستعبط ياحمار ازيك عامل ايه، قالي انا مدير الشركة وعايز والدك، قولتله ههههه لا ظريف يابن العبيطه مش عليا انا وقفلت، تاني يوم ابويا رجع البيت طردني

مره، كنت بشتغل فى سنترال فا جاتلى ست كبيره وجابتلى نوته فيها اسماء وقالتلى اطلبلى ابو اشرف وفضلت ادور فى الاسماء ملقتش حد خالص بالاسم ده فقولتلها مفيش يا حجه الاسم ده قالتلى امال مين اللى عندك فقولها محمد عبد السميع ولسه بكمل قالتلى ما هو ده ابو اشرف يابنى

النهارده، كنت اعد بتغدى مع اخويا، و متضايق منه عشان موضوع عملو امبارح، و هوا اعد يهزر و يحكيلى عن حاجات، و انا منفضلو و مركز فى الاكل، فا قالى فكها بقى يا عليوه و راح مطلع رجله و حطها فى طبقى

مره، اتصلت بعميل علشان اكمل البيانات الناقصه في الشركه، انا شغال كول سنتر في موبينيل، قلتلو مساء الخير يا فندم مع حضرتك محمد خالد من موبينيل ممكن نكمل بيانات حضرتك، قالى انا بلعب ضوومنه دلوقتى كلمنى لما اخلص العشرررة علشان بلعب على 50 جنيه و قفل السكه

النهارده، كنت بلعب مع ابن اختى (5 سنين) فكنت بزق المرجيحة جامد، و كان راكب معاه بنت صغيرة بتاع 5 سنين فكانت بتقولى "متزقش جامد يا عمو، أنا خايفة أوى" راح ابن اختى قالها "متخافيش طول ما أنا معاكى

النهارده، لسه راجع من الجيش و دخلت انام عشان كنت مطبق بقالي يومين في الجيش والاجازة بقي انتو عارفين، لقيت امي قعدت جنبي وبتقولي عاوزين نخطبلك بقي، قولتلها ربنا يسهل، قالتلي ايه رأيك في بنت عمتك، قولتلها كويسه ربنا يوفقها، وسيبتها و نمت عشان متوجعشي دماغي بالحوارات دي، صحيت لقيت امي قرت الفاتحه وبتقولي هنجيب شبكتك بعد المغرب

انتظروني كل يوم مع مواقف جديدة

ههههههههههههههههههههههههههههه
جامد أوى يا مان